بمناسبة اليوم العالمي للطفل
قصيدة (( كيف ننقذ الطفولة ))
-------------------------------------
يگلي حافظ عالطفولة
شلون احافظ عالطفولة ؟
الفعل يحتاج موقف
مو كلام وبس نگولة
الطفل يعني الحياة
يعني مستقبل رجولة
زلم باچر بالشدايد
جيل ساند الك ذولة
وإذا عندك همة اسمع
وابدي رايك في حلولة
أيدي بأيدك نسعى كلنه
حتى هالمطلب ننولة
أبد مو صعبة القضية
سلسة وبغاية سهولة
اذا انقذنه الطفولة
راح نجتث الضحولة
خيرنه يعم بوطنه
عام مثمر كل فصولة
والحياة تزدهر بينه
عيشة طيبة وهم عسولة
الورد عطره يفوح
وينموا ما يعرف ذبولة
شمس تشرق بالنهار
وگمر ما يعرف أفولة
نقتلع جذر الفساد
نحاكم اعوانة وفلولة
بكل شجاعة نگلة كافي
بكل بسالة وكل بطولة
مثل ما ثرنه أعلى د١٤ش
والنصر غيث بهطولة
على الباطل هم نثور
صولة نهجم باثر صولة
والشعب ننطي حقوقة
بلا منية بلا فضولة
نوفر العيشة الكريمة
والتساوي يعم شمولة
وبعد تتساوى الحقوق
نسوة واطفال وكهولة
مسكن ومأكل ومشرب
وشي بسيط من السيولة
والمعلم يعلى شانة
ندعمه ونلجم عذولة
فارس وأب ثاني يبقى
نعبئة ونسرج خيولة
والعلم يرجع ينور
نقضي عالحقبة الجهولة
وبعد نقضي أعلى التشرد
والعلاقات المهولة
ننشر اخلاق وفضيلة
ودينة نشيد أصولة
اعتقد هذي المطالب
عد بعض ناسك خجولة
واذا نفشل بالمساعي
بسب هالزمرة الخذولة
ما نلوم الا نفسنه
وننكتب أمة كسولة
واذا نفشل ما نأيس
نحرر الايد الغلولة
والطريق شما يطول
تنتهي الشدة بوصولة
أحمد إبراهيم الربيعي
ليست هناك تعليقات:
إرسال تعليق